پیرس اولمپکس 2024 اختتام پذیر ہوگئے، امریکا نے سب سے زیادہ میڈلز جیت کر میدان مار لیا۔امریکا 40 گولڈ، 44 سلور اور 42 برانز سمیت 126 میڈلز کے ساتھ مسلسل چوتھی مرتبہ اولمپکس میڈل ٹیبل پر نمبر ون رہا۔ چین 40 گولڈ، 27 چاندی اور 24 کانسی سمیت 91 تمغوں کے ساتھ دوسری پوزیشن پر براجمان رہا۔پاکستان تمغوں کی دوڑ میں ڈومینیکا کے ساتھ مشترکہ طور پر 62 ویں نمبر پر رہا۔ پاکستان کو میڈل ٹیبل پر لانے کا سہرا اولمپین ارشد ندیم کے سر گیا، انہوں نے جیولن تھرو میں92.97 میٹرز کے اولمپک ریکارڈ کے ساتھ پاکستان کو 40 برس کے بعد گولڈ میڈل دلوایا۔لاس اینجلزاولمپکس 1984 میں پاکستان نے منظور جونیئر کی قیادت میں جرمنی کو شکست دے کر ہاکی میں تیسرا اولمپک میڈل جیتا تھا، پاکستان نے اولمپک مقابلوں میں اب تک محض 11 میڈلز حاصل کیے ہیں جن میں 3 گولڈ ،3 سلور اور2 برانزمیڈلز قومی پاکی ٹیم نے جیتے۔پاکستان کو انفرادی حیثیت میں پہلا برانز میڈل روم اولمپکس 1960 میں کشتی میں پہلوان محمد بشیر نے دلوایا جبکہ سیول اولمپکس 1988 میں باکسر حسین شاہ نے مڈل ویٹ کے درجے میں تیسری پوزیشن کے ساتھ پاکستان کے لیے دوسرا برانز میڈل جیتا۔اس طرح ارشد ندیم انفرادی گولڈ میڈل جیتنے والے پہلے پاکستانی اولمپئین بنے، پیرس اولمپکس میں شریک 204 ممالک میں سے 82 ممالک کو میڈلز جیتنے کا اعزاز حاصل ہوا۔واضح رہے کہ فرانسیسی دارالحکومت میں اوکمپک گیمز میں 16 دنوں کے دوران 329 تمغوں کے مقابلے ہوئے۔