لندن ۔ سلوک نیوز۔ سپین کے نوجوان ٹینس اسٹار کارلوس الکاریز نے ومبلڈن ٹینس کے فائنل میں سربیا کے نوواک جوکووچ کو شکست دیکر پہلا ٹائٹل اپنے نام کر لیا۔ کارلوس الکاریز اور نوواک جوکووچ کے درمیان ومبلڈن کا فائنل 4 گھنٹے 42 منٹ تک جاری رہا، کارلوس الکاریز نے پہلا ومبلڈن ٹائٹل اپنے نام کیا۔ پہلا سیٹ ہارنے کے بعد کارلوس الکاریز نے کھیل میں بہترین واپسی کی اور 5 سیٹس پر مشتمل فائنل میں تین سیٹ جیت کر ٹینس اسٹار جوکووچ کو شکست سے دوچار کیا۔ اس موقع پر الکاریز کا کہنا تھا جب سے پیدا ہوا تو اس وقت سے جوکووچ کو ٹینس ٹورنامنٹ جیتتے ہوئے دیکھ رہا ہوں۔ الکاریز کا کہنا تھا جوکووچ نے مجھے بہت متاثر کیا ہے یہ بہت ہی شاندار کھلاڑی ہیں، میں نے جوکووچ کو ٹینس کھیلتے دیکھ کر ہی ٹینس کھیلنا شروع کیا اور آج آپ کے خلاف میچ جیت کر بہت ہی اچھا محسوس ہو رہا ہے۔ الکاریز کی جیت کا اسکور ایک چھ، سات چھ، چھ ایک، تین چھ اور چھ چار رہا۔ برطانوی شہزادی کیٹ مڈلٹن نے کارلوس الکاریز کو ومبلڈن ٹرافی پیش کی۔ خیال رہے کہ گزشتہ 4 ومبلڈن گرینڈ سلیم نواک جوکووچ کے نام رہے، جوکووچ نے 2018، 2019، 2021 اور 2022 کی ومبلڈن ٹرافیز اپنے نام کیں، 2020 کا ومبلڈن ٹورنامنٹ کورونا کے باعث نہیں ہو سکا تھا۔